Русија објави дека последните ракетни напади во источна Украина, биле насочени кон складишта за муниција и гориво. Четири такви цели биле погодени во близина на градовите Барвинкова, Покровскоје, Воздвиженка и Березово.
Во другите ракетни и воздушни напади, руските сили погодија 10 локации каде што се стационирани украински војници и опрема, соопшти Министерството за одбрана. Од таму велат дека убиле до 120 војници во тие напади и уништиле четири тенкови и шест други оклопни возила.
Руските артилериски единици погодија 389 цели во текот на ноќта, а мета беа, меѓу другите, 35 командни пунктови, 33 артилериски позиции и 15 складишта за ракетно и артилериско оружје и муниција, додаде Министерството.
Соборени се 18 украински беспилотни летала, вклучително и три беспилотни летала Бајрактер TB-2 од турски дизајн, велат Русите.
Автентичноста на бројките не е потврдена.
Инаку, Русите велат дека во војната досега уништиле 142 украински авиони, 112 хеликоптери, 658 беспилотни летала и повеќе од 2.500 тенкови.