Романската полиција денеска уапси двајца вооружени државјани на Украина кои ја преминале границата меѓу двете земји откако ги нападнале украинските граничари и украле муниција.
Романската полиција соопшти дека околу 13 часот на територијата на Романија влегле три лица, откако украински колеги го пријавиле инцидентот, но малку подоцна излегле со ново соопштение во кое се наведува дека две лица кои имале оружје илегално ја преминале границата, вклучително и гранати, јавува ПресСМ.
Полицијата распореди патроли и хеликоптер во потрага по бегалците, кои подоцна беа приведени.
Еден осомничен наводно и го покажал на романската полиција местото во близина на границата каде што го оставил оружјето, а украинската полиција нешто пред 17 часот соопштила дека е уапсено трето лице кое не успеало да премине во Романија.
Засега не е позната причината за инцидентот, но романските и украинските медиуми јавуваат дека напаѓачите побарале политички азил од романските власти.
Во мај околу 11.000 Украинци илегално ја преминале границата со Романија за да избегнат мобилизација поради војната меѓу Украина и Русија, пишува „Европска Правда“.