Најмалку 20 луѓе загинаа, шест се повредени, а две лица се водат како исчезнати по силниот земјотрес со магнитуда од 7,7 степени што утрово ја погоди источна Индонезија.
Земјотресот го погоди подрачјето кај островот Флорес во 5:58 часот по локално време, на длабочина од околу 10 километри. Епицентарот се наоѓаше на 68 километри северно-северозападно од градот Енде во провинцијата Источна Нуса Тенгара, според податоците на Американскиот геолошки институт.
По главниот удар се регистрирани повеќе последователни потреси, меѓу кои и еден со магнитуда од 6,1 степени.
Земјотресот предизвика уривање и оштетување на објекти, а жителите во паника ја напуштија крајбрежната зона.
🇮🇩 TERREMOTO EN INDONESIA: pic.twitter.com/Y0djTWTFFX
— Alerta Mundial (@AlertaMundoNews) August 14, 2026
„Одеднаш почна да се тресе и ме фати паника. Пациентите беа евакуирани од објектот откако на ѕидовите беа забележани пукнатини“, изјави Лукас Лотар, раководител на службата за управување со пациенти во една болница.
Поради плиткиот подморски земјотрес, властите издадоа предупредување за цунами за делови од провинциите Источна Нуса Тенгара, Западна Нуса Тенгара и Јужен Сулавеси. Се очекуваше брановите да достигнат височина од 0,5 до три метри.
На жителите во крајбрежните подрачја им беше наредено да се оддалечат од брегот и да се упатат кон повисоките места.
INDONESIA ROCKED by 7.7 MEGA QUAKE as BUILDING COLLAPSES
POWERFUL AFTERSHOCKS RATTLE REGION
TSUNAMI WARNING ISSUED https://t.co/77KNtlToHG pic.twitter.com/FK6pbAkAKo
— RT (@RT_com) August 14, 2026
Предупредувањето за цунами подоцна беше укинато, откако следењето на нивото на морето не покажа значителни промени. Властите сепак продолжија да ја следат ситуацијата.
„Ги повикуваме луѓето долж северниот брег на Флорес и во јужните области веднаш да се евакуираат“, изјави Абдул Мухари, претставник на Националната агенција за управување со катастрофи.
Индонезија е особено изложена на земјотреси и цунами поради нејзината положба на Пацифичкиот огнен прстен, една од најактивните сеизмички зони во светот.