Рускиот претседател Владимир Путин денеска на колегиумот на Министерството за одбрана на Русија изјави дека воено-политичката ситуација во светот останува тешка и нестабилна, дека „Западот ја турка Русија на црвената линија“ и дека Москва не може, а да не одговори на тоа.
Путин рече дека крвопролевањето продолжува на Блискиот Исток и дека САД продолжуваат да ја поттикнуваат ескалацијата на конфликтот во Украина со испраќање оружје, пари и платеници.
Путин посочи дека сегашната американска администрација и колективниот Запад не се откажуваат од обидите да ја задржат доминацијата во светот, како и дека земјите-членки на НАТО ги зголемуваат буџетите за одбрана, пренесе РИА Новости.
Тој исто така предупреди дека НАТО го зголемува своето присуство во азиско-пацифичкиот регион со распоредување ракетни системи, наведувајќи дека Русија ќе одговори на ризиците поврзани со потенцијалното распоредување на американски ракети во тој регион.
– САД го плашат своето население со митски изјави дека Русија наводно планира да нападне некого – рече Путин.
Според него, Русија е принудена да преземе дополнителни безбедносни мерки, но тоа го прави внимателно, како и опремувањето на руската армија и морнарица со модерно оружје се одвива со забрзано темпо.
Путин посочи дека Русија посветува сериозно внимание на зголемување на потенцијалот на своите вооружени сили, како и на продолжување на прогресивниот и систематски развој на армијата и морнарицата.
Тој истакна дека руските трупи цврсто ја држат стратешката иницијатива долж линијата на украинскиот фронт и дека оваа година презеле контрола над 189 украински населби.