Рускиот претседател Владимир Путин ја обвини Украина за смртоносен напад со беспилотни летала врз студентски дом во Старобилск, во окупираниот регион Луганск, и ѝ нареди на војската да подготви опции за одговор, објави Ројтерс.
Според тврдењата на Москва, шест лица загинале во нападот, десетици млади луѓе се повредени, додека 15 лица сè уште се водат како исчезнати. Руските власти велат дека до 18 деца може да се закопани под урнатините.
Путин рече дека целта на нападот бил студентски дом во Старобилск, град во рускиот контролиран дел од регионот Луганск во источна Украина, и рече дека украинската армија „мора да знаела што цели“.
„Во близина нема воени објекти, разузнавачки служби или сродни институции. Затоа, нема основа за тврдења дека зградата била погодена од нашиот систем за воздушна одбрана или електронско војување. Нападот не бил случаен; бил извршен во три бранови, а 16 беспилотни летала ја таргетирале истата локација“, им рече Путин на службениците.
Тој додаде дека на руската војска ѝ е наредено да подготви опции за одмазда.
Украина сè уште не го коментираше инцидентот, а Ројтерс објави дека не може независно да ги потврди околностите на нападот.
Руската комесарка за човекови права Јана Лантратова изјави дека во домот имало 86 тинејџери на возраст од 14 до 18 години, кои спиеле кога нападот со беспилотно летало бил извршен во текот на ноќта.
Леонид Пашечник, шеф на проруските власти во регионот Луганск, изјави дека две лица се извлечени од урнатините, додека претседателската комесарка за правата на децата, Марија Лвова-Белова, предупреди дека до 18 деца може да останат закопани.
Според неа, некои од хоспитализираните деца се во сериозна состојба.
Портпаролот на Кремљ, Дмитриј Песков, го нарече нападот „монструозен злостор“ и побара одговорните да бидат казнети.
„Ова е монструозен злостор. Напад врз образовна институција каде што се присутни деца и млади луѓе“, изјави Песков пред новинарите.
Москва објави дека Советот за безбедност на Обединетите нации ќе одржи итна седница во Њујорк подоцна денес во врска со инцидентот.
Руското Министерство за надворешни работи тврди дека нападот ги уништил трите горни ката од студентскиот дом од вкупно пет ката.
Фотографиите и видеата објавени од руските власти покажуваат како спасувачите ги изнесуваат повредените лица од урнатините, тешко оштетените згради и пожарите што горат.
Војната меѓу Русија и Украина трае од февруари 2022 година, а двете страни негираат намерно таргетирање на цивили. Украинскиот претседател Володимир Зеленски минатата недела вети одмазда по рускиот ракетен напад врз станбена зграда во Киев, во кој загинаа 24 лица, меѓу кои и три деца.