Италијанскиот конзул во либискиот град Бенгази, Гвидо де Санктис, остана неповреден кога непознати лица денеска пукаа врз неговиот автомобил, соопшти италијанското Министерство за надворешни работи.
-Тој е неповреден, рече претставник на министерството.
Неименуван безбедносен извор од Либија за британските медиуми изјави дека италијанскиот конзул се наоѓал во оклопно возило и дека нема повредени во нападот.
На безбедноста на западните државјани во вториот по големина либиски град се посветува се поголемо внимание откако на 11 септември минатата година во напад врз американскиот конзулат беше убиен амбасадорот и уште тројца американски државјани.