Претседателот на САД Доналд Трамп наведе дека кон крајот на месецов ќе ги посети Саудиска Арабија, Израел и Ватикан, во текот на неговата прва турнеја во странство откако стапи на должноста.
Американскиот претседател, по посетата на овие три земји, планира да учествува на самитот на Г-7 во Сицилија и на НАТО во Брисел.
– Моето прво патување во странство како претседател на САД ќе биде во Саудиска Арабија, потоа во Израел, а потоа на место каде кардиналите многу ме сакаат, Рим, изјави Трамп.
Ватикан потврди дека папата Франциско ќе го прими Трамп на 24 мај. Средбата ќе се одржи во 8.30 часот, по локално време.
Папата Франциско е критичен кон позициите на Трамп за мигрантите и бегалците.
По средбата со папата, Трамп ќе разговара и со државниот секретар на Ватикан – кардиналот Пиетро Паролин, кој е премиер на Ватикан и со архиепископот Пол Галагер, кој е министер за надворешни работи на папата, соопшти Ватикан.
Потоа Трам ќе учествува на средбата на врвот на НАТО во Брисел на 25 мај и на самитот на Г-7 на 26 и 27 мај во Таормина, Сицилија.