Американскиот претседател Барак Обама следниот месец за последен пат во својство на шеф на држава ќе ги посети Грција, Германија и Перу, соопшти денеска Белата куќа.
Турнејата, која ќе трае од 14 до 21 ноември, ќе следи само неколку дена откако ќе биде избран наследникот на Обама.
– Оваа посета ќе го нагласи претседателското обврзување кон трансатланската солидарност, силната и интегрирана Европа и соработката со некои азиско-пацифички партнери, изјави портпаролот на Белата Куќа, Џош Ернест.
Обама во Грција ќе се состане со претседателот Прокопиос Павлопулос и премиерот Алексис Ципрас и ќе изрази поддршка за економските реформи во земјата.
На 17 и 18 ноември Обама ќе разговара со германската канцеларка Ангела Меркел за Украина, Сирија и борбата против ИД.
Се очекува дека во Берлин Обама ќе се состане со група европски лидери, меѓу кои и францускиот претседател Франсоа Оланд, италијанскиот премиер Матео Ренци и британската премиерка Тереза Меј.
Во Перу претседателот на САД ќе присуствува на Азиско-пацифичкиот форум за економска соработка во Лима, кој ќе се одржи од 18 до 20 ноември.