По победата на Алжир во финалето на Купот на Нациите на Африка, неколку илјади навивачи на Алжир се собраа под Триумфалната порта во Париз, како и во неколку други градови низ целата земја за да ја прослават титулата, јави дописникот на МИА.
Во Париз, илјадници луѓе се собраа на и околу Шанзелизе. Областа беше обезбедувана од околу 2.500 полицајци. Околу еден часот по полноќ, во близина на Шанзелизе, навивачките групи ја испровоцираа полицијата со фрлање пиротехнички средства, како и стаклени шишиња и камења. Полицијата возврати со употреба на солзавец. Сепак, ситуацијата се нормализира за неколку минути.
Во текот на ноќта 102 лица беа уапсени во Париз, од нив 86 беа притворени, според извештајот на Министерството за внатрешни работи. Низ цела Франција, 198 лица се уапсени и 177 ставени во притвор, според истиот извор.
Најголемата прослава на победата на Алжир во Франција беше во Марсеј, каде се претпоставува дека на улиците излегле околу 25.000 навивачи на Алжир.