Во Краков вчера почна неофицијална дводневна средба на претседателите на Бугарија, Германија, Естонија, Италија, Летонија, Полска, Португалија и Финска.
Меѓу главните теми во дискусиите се економската криза, трансатлантските односи и престојната средба на врвот во ноември на иницијативата „Источно партнерство“.
Kабинетот на полскиот претседател Бронислав Коморовски, кој е организатор и домаќин на средбата, соопшти дека тој планира да го привлече вниманието на потребата од поширока евроинтеграција и од длабоки структурни промени за преземање мерки против кризата.
Според Коморовски, би требало да се проширува соработката со стратешките партнери на ЕУ, од кои најголем партнер остануваат САД.
Коморовски се залага и за создавање трансатлантско трговско-инвестициско партнерство, што ќе овозможи стимулирање на економскиот раст.
Денеска осумте шефови на држави ќе ја разгледаат политиката на добрососедство, вклучувајќи ја и програмата „Источно партнерство“, насочена кон зближување на ЕУ со Азербејџан, Ерменија, Белорусија, Грузија, Молдавија и Украина.