На Киев му беше кажано дека е „апсолутно можно“ преговорите за членство во Европската унија да започнат оваа година, изјави украинскиот претседател Володимир Зеленски по ненадејниот состанок на министрите за надворешни работи на ЕУ во главниот град на Украина.
– Нашата клучна цел на интеграцијата е да донесеме одлука за почеток на преговорите за членство оваа година. И денеска уште еднаш на состаноци и преговори слушнав дека тоа е апсолутно можно – рече Зеленски во ноќното обраќање.
Тој рече дека е „само прашање на време“ кога Украина ќе се приклучи на блокот и дека „дефинитивно ќе го исполни“ својот дел од предусловите, објави „Гардијан“.
– Нашата земја е лидер во заштитата на самите основи на кои почива европското единство. Единството на модерна Европа, која ја цени човековата слобода и еднаквоста на народите, го цени меѓународното право – рече Зеленски.
Тој наведе дека се воделе разговори за обидот на Русија да ги заобиколи меѓународните санкции, безбедноста во Црното Море и работата на украинските пристаништа, како и за зајакнувањето на украинската воздушна одбрана. Тој исто така рече дека Италија се обврзала да ја обнови катедралата во Одеса, која беше уништена од руски ракетен напад во јули.
Украина и Европската унија ќе го одржат следниот состанок на Советот на министри за надворешни работи на ЕУ во декември оваа година, изјави украинскиот премиер Денис Шмигал.
„Украина и ЕУ ќе го одржат следниот состанок на Советот за асоцијација во декември оваа година. Ова беше договорено на состанокот со високиот претставник на Европската унија за надворешна политика и безбедност, Жозеп Борел“, напиша тој на Фејсбук и додаде дека на средбата се разговарало и за интеграцијата на Украина во ЕУ.
Пристапувањето во ЕУ е наша приоритетна цел и работиме заедно, координирано и упорно тоа да се случи што поскоро, нагласи Шмигал.