Последните податоци од Чешкиот хидрометеоролошки завод (ЧХМУ) покажуваат дека годинава во земјата времето најчесто било облачно, а жителите на Прага, каде сончево било само 80 часа, слободно можат да кажат дека „не ги огреало Сонце“.
Само за споредба, во 2011 година, во истиот период од годината сончево и јасно било 417 часа, јави дописникот на МИА од чешкиот главен град.
– Недостигот од сончева светлина може да влијае на пониска просечна топлина на воздухот, но и на психичкото здравје на населението и почесто се јавува депресија и самоубиствени нагони, вели Петр Дворжак од ЧХМУ.
Според Дворжак, не може да се генерализира и предвидува дека таквата состојба ќе продолжи до крајот на годината, со оглед на тоа што не е позната причината за промените.
Сепак, се очекува температурите во земјата во летните месеци да бидат повисоки поради глобалното затоплување.