Голем пожар што утрово избувна на меѓународниот аеродром „Џомо Кенијата“ во Најроби е локализиран, но ја уништи зградата за слетувања, поради што аеродромот е затворен и сите летови се пренасочени на аеродромите на соседните земји.
Аеродромот ќе биде отворен попладне за домашни и меѓународни карго летови. Летовите ќе се извршуваат од карго терминалот.
Пожарот избувна на 15-та годишнина од бомбашкиот напад врз американската амбасада во Најроби и Дар ел Салам во соседна Танзанија, но засега нема знаци дека станува збор за терористички напад.
Засега нема информации за повредени, изјави секретарот во Министерството за сообраќај и инфраструктура Мајкл Камау.
Аеродромот во Најроби е еден од најзначајните во источна Африка и неговото затворање ќе го погоди функционирањето на летови во регионот и пошироко.