Голем пожар избувна доцна синоќа во познатиот трговски центар „Стеибл“ во општина Камден во северниот дел на Лондон.
Од засега непознати причини огнот избувнал во празните подпокривни прострории на центарот, во кој се сместени повеќе продавници за книги, облека и накит.
Маркетот важи за култно место за младите од Лондон и за бројните туристи, затоа што околу него има бројни пабови, ноќни клубови и мали ресторани, како и продавници за производи кои најчесто не може да се најдат во другите делови од Лондон, а кои работат од раните утрински часови.
Во гаснењето на пожарот учествуваа десетина противпожарни екипи и околу стотина пожарникари, а густиот чад од Камден се гледаше неколку километри.
Од центарот, како и од околните угостителски и трговски објекти, беа евакуирани повеќе од 600 луѓе, а полицијата ги блокира сите околни улици и го запре автобускиот сообраќај по главната улица во Камден, која го поврзува со центарот на британскиот главен град.
Во пожарот нема повредени. Претставник на противпожарната служба изјави дека пожарникарите успеале да спречат огнената стихија да ги зафати околните згради и да се рашири низ целиот кварт, како и да ја зафати пругата на надземната железница која минува над центарот.
„Стеиблс маркетот“ се наоѓа на местото на некогашнаата најголема лондонска коњушница „Пикфорд“ и на соседната ветеринарна болница, што заеднички функционирале во времето кога за градскиот сообраќај во Лондон, како и за влечење на сплавовите по каналите, била потребна коњска сила.
Просторот на некогашната коњушница „Пикфорд“ се смета за локација со историско значење за Лондон.