Шест лица, од кои пет жени, загинаа, а најмалку 68 се повредени во пожар во текот на ноќта во дом за стари лица во Милано, соопшти денеска италијанската служба за итни случаи.
Портпаролот на противпожарната служба за Ројтерс ја потврди бројката на загинати, велејќи дека пожарот е изгаснат и се истражуваат неговите причини. Тој соопшти дека три лица се хоспитализирани во критична состојба, 15 со тешки повреди кои не се опасни по живот и околу 50 се со полесни повреди.
Градоначалникот на Милано, Џузепе Сала, во разговор со новинарите на лице место изјави дека пожарот бил изгаснат многу брзо, но дека поради испарувањата и чадот голем дел од корисниците на домот останале зашеметени.
Италијанските новински агенции, цитирајќи ги регионалните служби за итни случаи, претходно објавија дека 81 лице се хоспитализирани, меѓу кои две се во критична состојба.
Според медиумите, пожарот избувнал нешто по полноќ во зградата во југоисточниот кварт Корвето.