Владата на Сиера Леоне побара од целото шестмилионско население во земјата три дена да не излегува надвор од своите домови за да се спречи ширењето на ебола.
Кампањата започнува утре, а локалните експерти сметаат дека на овој начин ќе се спречи ширењето на епидемијата од смртоносната болест во регионот. Се предвидува сите граѓани да не ги напуштаат домовите доколку немаат потреба, а околу 20.000 доброволци во меѓувреме да ги изнесуваат од станбените згради телата на починатите и да ги пренесат заразените во болници и времени центри.
Скептиците стравуваат дека Сиера Леоне, која е една од најсиромашните земји во светот, нема да може да спроведе ефективна кампања, а преземените мерки само ќе ја заострат кризата.
– Властите во земјата си поставуваат „крајно нереални“ цели, смета Жан-Ерве Брадол, поранешен раководител на организацијата „Лекари без граници“, кој има огромно искуство со борбата против епидемии во Африка.
Според него, Сиера Леоне не може да организира посети во сите семејства за три дена, за многумина ќе биде многу тешко да останат затворени 72 часа, сите лекари ги немаат потребните квалификации и во земјата нема да може да се создадат доволно центри за борба против болеста.