Пакистанската полиција го обвини поранешниот премиер Имран Кан за тероризам, објави денеска британската телевизиска мрежа Би-Би-Си .
Кан беше обвинет по јавниот говор во кој тој тврдеше дека властите го мачеле неговиот близок соработник Шахбаз Гил, кој претходно беше приведен под обвинение за бунт.
Во саботата, Кан зборуваше против началникот на полицијата и судијата во Исламабад, поради притворањето и наводното малтретирање на неговиот партиски колега. „Треба и вие да се подготвите бидејќи ние ќе преземеме акција против вас“, рече Кан.
Тој беше обвинет за кршење на антитерористичките закони бидејќи наводно во говорот им се заканувал на владини претставници. Кан се уште не го коментирал обвинението.
Стотици поддржувачи на поранешниот премиер се собраа пред неговата куќа во Исламабад во знак на поддршка.
Политичките сојузници на Кан денеска предупредија дека неговото апсење ќе ја премине „црвената линија“. „Ако Имран Кан биде уапсен… ќе го преземеме Исламабад“, напиша на Твитер поранешниот министер во кабинетот на Кан, Али Амин Гандапур.
Полицијата која била присутна на местото на настанот изјавила дека не дошла да го уапси поранешниот лидер, туку да го одржува редот и мирот.
Поранешниот пакистански премиер беше сменет на почетокот на април со гласање недоверба во парламентот.
Дотогаш ниту еден пакистански премиер не беше сменет од власт на овој начин.
Оттогаш, Кан е остар критичар на актуелната влада. И покрај неговата смена, тој сè уште има поддршка од голем број Пакистанци.
Извор: МИА