Американскиот претседател Доналд Трамп изјави дека неговото трпение кон Иран е при крај, откривајќи детали од разговорите со кинескиот претседател Си Џинпинг, во кои главна тема биле тензиите на Блискиот Исток и безбедноста на енергетските рути.
Според Белата куќа, двајцата лидери разговарале за состојбата околу Ормутскиот Теснец, при што било нагласено дека пловниот пат мора да остане отворен за меѓународниот сообраќај. Загриженоста доаѓа по ограничувањата што Иран ги воведе по ескалацијата на американско-израелските напади кон крајот на февруари, што предизвика нови потреси на светските енергетски пазари.
Во интервју за Fox News, Трамп порача дека Техеран мора да постигне договор, посочувајќи дека дополнителна загриженост создаваат и иранските залихи на збогатен ураниум.
Трамп изјави дека кинескиот лидер му дал уверување оти Пекинг нема да испорачува воена опрема на Иран, додавајќи дека Си изразил подготвеност да помогне во евентуални дипломатски напори за намалување на тензиите.
И покрај ваквите пораки, аналитичарите оценуваат дека е неизвесно дали Кина би се вклучила во посериозен притисок врз Техеран, особено имајќи ја предвид економската и енергетската соработка меѓу двете земји.