Независниот аналитичар за одбрана Конрад Музика изјави за Скај њуз дека „сè укажува на тоа дека Белорусија ќе се приклучи на војната во иднина“. Музика ги опиша белоруските вооружени сили како „еден вид мистерија“ и додаде дека редовните единици на белоруската армија од април практично без престан поминуваат обука, а неодамна ги ажурираше информациите за воените резервисти.
„Интензитетот и обемот на воената активност на белоруските вооружени сили е на највисоко ниво од крајот на Студената војна. Никогаш не сме виделе такво ниво на обука на белоруските сили. Од крајот на април тие спроведуваат обука поврзана со практично секоја воена активност што би им била потребна во случај да бидат вклучени во војната“, рече Музика.
„Тие, исто така, го тестираа својот капацитет за мобилизација, па неодамна објавија дека завршиле со ажурирање на податоците за сите воени резервисти во Белорусија“, рече тој и додаде: „Ова значи дека резервистскиот систем сега е подготвен за мобилизација. Потребна е политичка одлука за започнување на мобилизација и војна“.