Полска подига „Источен штит“ вреден 2,2 милијарди евра долж границите со Русија и Белорусија за да го заштити источното крило на НАТО во време кога се очекува да се намали поддршката на САД за европската одбрана.
Овој ѕид долг 640 километри ќе вклучува противтенковски бариери, бункери и други пречки, сето тоа во светло на доаѓањето на власт на Доналд Трамп во САД, кој најави намалување на помошта за Украина.
Овој проект е одговор на руската војна во Украина и на таканаречените хибридни воени тактики на Белорусија и Русија. Полскиот премиер Доналд Туск рече дека целта е да се одврати непријателот и да се заштитат Полска и нејзините сојузници. Покрај тоа, Полска има најголем воен буџет во однос на БДП меѓу членките на НАТО.
Проектот ќе користи современи технологии за надзор, вклучувајќи вештачка интелигенција за рано откривање на заканите, како и сателитски компоненти за дополнителна безбедност во вселената.
Одбранбената линија ќе биде длабока околу 200 метри, со огради, ровови и мински полиња. Ќе се постават и бетонски пречки, како и бункери и засолништа скриени во шумите.
На патот ќе бидат поставени и пречки, вклучително и „змејски заби“ – шилести бетонски блокови кои се користат за запирање на движењето на оклопните возила.
Варшава тврди дека Минск и Москва можеби работат во дослух за да ги префрлат барателите на азил кон запад, оптоварувајќи ги тие земји и поттикнувајќи ја реториката за поделби.
– Границата не може да се помине неказнето… Зад оваа постапка стојат Русија и Белорусија, а целиот свет ја нарекува хибридна војна. Нема да се повлечеме – рече Туск во јули и додаде дека Полска е силна и ќе биде безбедна благодарение на сопствените акции и сојузниците.
Калининград, тешко вооружена руска ексклава меѓу Балтичкото Море, Полска и Литванија, се смета за растечка закана за Западот. Полскиот министер за надворешни работи тврди дека Русија можеби складира до 100 нуклеарни боеви глави на таа територија.