Францускиот претседател Франсоа Оланд денеска соопшти дека починало едно од повредените лица во вчерашниот напад во Нант, јави дописникот на МИА од Париз.
Во вчерашниот напад во Нант, возач за кој постојат сомневања дека бил психолошки растроен, намерно влегол во пешачката зона каде се наоѓал божикниот панаѓур и притоа прегазил 11 лица. Возачот, пред да биде уапсен, самиот повеќе пати се прободел со нож.
Божикниот пазар во Нант, попладнево повторно беше отворен за јавноста.
Потврдувајќи ја смртта на едно од повредените лица, Оланд, кој се наоѓа во посета на францускиот архипелаг Сен Пјер и Миклон, предупреди да „не се попушта пред паниката“.
– Во текот на три дена, се случија три тешки настани. Овие три настани не се поврзани меѓу себе, но има совпаѓања. Тоа оправдува зголемена будност и голема ладнокрвност. Ние не треба да попуштиме пред паниката, на амалгамите и на стравовите, рече Оланд.
Францускиот претседател истакна дека треба да се делува против террозимот, давајќи до знаење дека актот во Жуе-ле-Тур имал терористички карактер.
По денешниот состанок на француската Влада се зајакнати безбедносните мерки со вклучување на дополнителни 200 до 300 војници во рамките на антитерористичкиот план Вижипират. Во моментов на јавните места во Франција, покрај редовните полициски сили, патролираат и околу 780 војници како зајакнување на полицијата.