Русија останува подготвена да ја реши кризата во Украина преку политички и дипломатски средства, изјави денес Дмитриј Песков, портпарол на рускиот претседател Владимир Путин.
„Русија го задржува својот интерес и подготвеност да ја реши украинската криза преку политички и дипломатски средства“, изјави Песков пред новинарите, според новинската агенција РИА Новости.
Песков рече дека сè уште нема напредок во врска со одржувањето на трилатерален самит меѓу Русија, Украина и САД.
Претседателот на САД, Доналд Трамп, претходно им кажа на новинарите дека трилатералниот самит на кој ќе учествуваат рускиот претседател Владимир Путин и украинскиот претседател Володимир Зеленски би можел да се одржи „релативно наскоро“.
„Не, досега нема напредок“, рече Песков, одговарајќи на новинарско прашање за изјавата на Трамп за можен трилатерален самит меѓу Русија, САД и Украина и дали има некакви договори за таков состанок.