Словачкиот претседател Петер Пелегрини денес изјави дека мировниот план на американскиот претседател Доналд Трамп за завршување на војната во Украина е прв, но голем чекор во вистинската насока и дека сè уште треба да се направи многу работа.
Тој напиша на социјалната мрежа X дека најважната задача сега е да се постигне вистински договор меѓу Украина и Русија, пренесува Tasr.
Пелегрини го пофали американскиот претседател и неговиот тим, за кои рече дека неуморно работат за постигнување мир во Украина и дека мировниот план од 28 точки е многу силен и многу сериозен прв чекор.
– Најважно е сега да се постигне вистински договор меѓу Украина и Русија, кој е силно поддржан од САД, ЕУ, НАТО и сите клучни меѓународни партнери. Така се постигнуваат резултати, напиша Пелегрини.
Делегациите од Украина, САД и европските земји разговараа за американскиот план од 28 точки за завршување на војната во Украина во Женева во недела, откако Киев и неговите сојузници изразија незадоволство од делови од предложениот план што предвидуваат големи отстапки за Русија.
Во меѓувреме, се појави европски предлог подготвен од Обединетото Кралство, Франција и Германија, кој го зема американскиот план како основа, но потоа го анализира точка по точка со предложени измени и бришења на одредени делови.