Одлуката на поранешниот државен секретар на Ватикан, Тарчизио Бертоне да се пресели во луксузен апартман во центарот на Рим, предизвика револт кај Римокатоличкиот поглавар, папа Франсис кој пропагира скромен живот.
Седумдесет и деветгодишниот кардинал Бертоне, кој до заминувањето во пензија важеше за најстаро официјално лице на Ватикан, ќе живее на врвот од палатата „Сан Карло“.
Од балконот кој има површина од 100 квадратни метри, ќе има поглед на целиот град, а фотографиите кои што се објавени во списанието „Чи“ велат дека станот е опремен со скапоцен мебел.
Бертоне кој е во пензија од октомври минатата година, признава дека неговата нова резиденција е навистина пространа, но тврди дека е за половина помала од 700 квадратни метри кои се споменуваат во медиумите.
-Потполно е вообичаено становите во старите ватикански згради да бидат големи. Новиот дом го реновирав со сопствени средства и во него планирам да живеам само привремено. Потоа ќе го препуштам на користење на некој друг- рече кардиналот.
Инаку дури и кога навистина станот на Бертоне е помал за 350 квадратни метри, тој сепак би бил пет пати поголем од собата во која живее папа Франсис.
Е. Г.