Папата Франциско предупреди дека „нема привилегии“ за бискупите кога е во прашање сексуалното злоставување на деца, и најави дека во почетокот на јуни ќе одржи прв состанок со една група жртви на злоставување.
Истакнувајќи дека нема да покаже толеранција кон било кој во Католичката црква кој ги злоставувал децата, вклучувајќи ги и бискупите, папата рече дека сексуалното злоставување на деца е ужасно злосторство, и го спореди со „сатанска миса“.
Враќајќи се од посета на Блискиот Исток, папата на новинарите им рече дека следната недела во Ватикан со жртвите на злоставувањето ќе одржи специјална миса.
– Тројца бискупи се под истрага. Еден од нив веќе е осуден. Нема привилегии. Свештениците кои тоа го прават го издаваат Бога, рече папата.
Ватикан пред три недели првпат објави комплетна статистика за тоа како се казнувани свештениците обвинети за силување и друго сексуално злоставување на деца, наведувајќи дека во последните десет години 848 свештеници се расчинети, а 2.572 добиле помали казни.