Кремљ поставил нов рок до кој руските сили треба да воспостават контрола врз целата Доњецка област во Украина, но руската војска смета дека рокот е нереален и бара повеќе време, тврди заменик-шефот на Кабинетот на украинскиот претседател, Павло Палиса.
Според него, руското политичко раководство поставило уште еден рок за целосно заземање на Доњецката област – до крајот на 2026 година.
Руската војска бара рокот да биде поместен до 31 март 2027 година, пренесува РБК-Украина.
Тој наведе дека за руските планови, како и за причините поради кои тие не се реализирани, се разговарало за време на неодамнешната средба на украинското раководство со Стив Виткоф и Џаред Кушнер, специјалните пратеници на американскиот претседател Доналд Трамп.
Според податоците на Институтот за проучување на војната (ISW), извор близок до Кремљ во пресрет на посетата на американската делегација во Москва и Киев изјавил дека мировен договор, наводно, не е можен пред да биде освоена целата Доњецка област.
Според истиот извор, рускиот претседател Владимир Путин е уверен дека руската војска може да ја исполни оваа задача до крајот на 2026 година.