Унгарскиот премиер Виктор Орбан објави отворено писмо до украинскиот претседател Володимир Зеленски, во кое ја критикува неговата политика кон Унгарија и го повикува да го промени својот пристап во врска со руско-украинската војна и енергетската безбедност и неговата „антиунгарска политика“.
Во писмото, Орбан вели дека Украина се обидува да ја „присили“ Унгарија да ја поддржи војната против Русија веќе четири години, со поддршка на Брисел и унгарската опозиција.
Орбан ја обвини Украина за координирани напори со Европската Унија и опозицијата во Унгарија за инсталирање на проукраинска влада.
– Четири години работевте на принудување на Унгарија во војна меѓу вас и Русија. За ова, добивте поддршка од Брисел во изминатите четири години и ја освоивте и унгарската опозиција. Исто така, гледаме дека вие, Брисел и унгарската опозиција преземате координирани чекори за да донесете проукраинска влада на власт во Унгарија, рече унгарскиот премиер, пренесува Хирадо.
Орбан се осврна на потегот на Украина, за кој тврди дека довел до блокирање на клучниот нафтовод „Дружба“, за кој тврди дека го загрозува снабдувањето со енергија на Унгарија и безбедноста на нејзините граѓани.
„Вашите постапки се спротивни на интересите на Унгарија и го загрозуваат безбедното и прифатливо снабдување со енергија на унгарските семејства“, рече тој.
Орбан го повика Зеленски да ја промени својата „антиунгарска политика“, нагласувајќи дека Унгарија не сака да учествува во војната ниту да ги финансира борбите.