Членството на Украина во Европската Унија претставува најголема опасност, изјави денес во Будимпешта унгарскиот премиер Виктор Орбан.
Орбан рече дека не е новост дека Унгарија е нападната, бидејќи „бриселските бирократи“, „предводени од (Џорџ) Сорос“, веќе ја нападнале Унгарија претходно, објави МТИ.
Тој рече дека ситуацијата сега е потешка бидејќи „Украинците им се придружија“.
„Членството на Украина во ЕУ е најголемата опасност денес“, рече тој, додавајќи дека ги разбира бидејќи „нивната земја, која веќе беше нефункционална и банкротирана пред војната, е уништена“.
Орбан рече дека Украинците не можат да стојат на свои нозе, дека им се потребни туѓи пари и затоа сакаат да се приклучат кон Европската Унија „веднаш и по секоја цена“.
– Не сакаме да нè вовлечат во војна, да ги уништат нашите земјоделци и да ја претворат најбезбедната земја во Европа во мафијашко гнездо, а не сакаме и парите на Унгарците да им се испраќаат преку Брисел, рече унгарскиот премиер.