Европската унија треба да помогне за забрзување на симнувањето од власт на Башар ал Асад, изјави францускиот претседател Франсоа Оланд пред средбата во Брисел со лидерите на земјите од ЕУ.
– За жал таму се води војна. Таа е насочена против Башар ал Асад. Сега треба да се посветиме на целта да го принудиме да си замине што е можно побрзо, изјави Оланд пред новинарите во белгискиот главен град.
Сириската опозициска коалиција е призната од поголемиот број држави за законски претставник на сирискиот народ, истакна тој.
Во предлог заклучната декларација европските лидери наведуваат дека се шокирани од влошувањето на ситуацијата во Сирија и ќе продолжат да дејствуваат приоритетно во однос на неа. Во документот сириската опозиција е означена како легитимен претставник на сирискиот народ.
На почетокот на неделата над 120 земји и меѓународни организации официјално ја признаа коалицијата на состанокот на групата „Пријатели на сирискиот народ“ во Маракеш, Мароко.