Најмалку 12 лица загинаа, а 18 се водат како исчезнати откако силен дожд предизвика лизгање на земјиштето викендов во илегален рудник за злато на индонезискиот остров Сулавеси, соопштија властите во понеделникот.
Во лизгањето на земјиштето загинаа рудари и жители кои живеат во близина на дивиот рудник, изјави шефот на локалната агенција за спасување Херијанто. Тој додаде дека петмина преживеани се евакуирани, а спасувачки тим во понеделникот трага по 18 исчезнати лица.
„Распоредивме 164 спасувачи, членови на националниот тим за спасување, полиција и воен персонал во потрага по исчезнатите“, рече Херијанто.
Спасувачите треба да пешачат околу 20 километри за да стигнат до местото на одронот, а ги отежнува густата кал на патот и постојаниот дожд во областа.
„Ќе се обидеме да го користиме багерот кога е можно“, рече тој.
Фотографиите од погоденото село покажуваат дека свлечиштето срамнило некои куќи, а Индонезиската агенција за управување со катастрофи (BNPB) извести дека одронот оштетил неколку куќи и еден мост.
БНПБ, исто така, ги предупреди жителите дека се уште се очекуваат дожд во некои области во понеделник и вторник и ги повика да бидат внимателни во случај на нова катастрофа.
Во лизгање на земјиштето во Јужен Сулавеси, предизвикано од обилни дождови, загинаа најмалку 18 луѓе во април, додека во мај бурните дождови што предизвикаа поројни поплави и лизгање на земјиштето убиле повеќе од 50 луѓе во индонезиската провинција Западна Суматра.