Десетици илјади луѓе повторно протестираа денеска во неколку бразилски градови против претседателот Жаир Болсонаро и неговото оспорувано управување со епидемијата на коронавирусот, во која починаа речиси 460.000 луѓе и постои опасност од ново влошување на ситуацијата.
Во центарот на Рио де Женеиро околу 10.000 луѓе со маски учествуваа на протестите, организирани од левичарски организации и студентски движења, извикувајќи „Болсонаро, оди си!“ и „Болсонаро геноцид!“.
Од почетокот на пандемијата, која тој ја нарече „грип“, Болсонаро ги критикуваше мерките на карантин, ги фалеше лековите без докажана ефикасност и не веруваше во ефикасноста на вакцините.
Демонстрантите сметаат дека би починале многу помалку луѓе доколку Владата порано започнеше кампања за вакцинација, која напредува бавно.
Тие го обвинуваат претседателот и за поддршка на уништувањето на шумите, насилството и расизмот во Амазонија.
Организаторите на протестите бараа од учесниците да ја почитуваат „социјалната дистанца“ и им делеле заштитни маски и алкохолен гел за чистење на рацете.
Рејтингот на Болсонаро се намали на 24 отсто и тоа е најголем пад во текот на неговиот мандат, покажуваат резултатите од истражувањето на институтот „Датафолха“. Според анкетата, поранешниот левичарски претседател Лула да Силва, кој е најголем противник на Болсонаро, е фаворит за победа на претседателските избори следната година.