Норвешката министерка за правда Моника Меланд соопшти дека е блокирана продажбата на стратешкиот производител на мотори „Берген енџинс“ (Bergen Engines) на руска компанија поради заштита на националната безбедност.
Плановите за продажба на филијалата на „Ролс-Ројс пауер системс“ (Rolls-Royce Power Systems) на руската компанија „ТМХ интернешнл“ (TMH International) за околу 1,6 милијарди круни (186 милиони долари) беа критикувани од страна на опозицијата.
– Продажбата би ги зајакнале воените можности на Русија, што несомнено е во спротивност на норвешките и на интересите на сојузниците поврзани со безбедносната политика. Владата ги разгледа информациите што и беа доставени од военото разузнавање, истакна Меланд пред Парламентот.
Таа додаде дека конечната одлука за стопирање на продажбата ќе биде донесена на владина седница в петок.
Министерот за одбрана Франк Баке-Јенсен наведе дека одлуката на Владата ја потврдува ефективноста на новиот закон за безбедност на Норвешка.
Според норвешката Влада, „Берген инџинс“ разви модерни технологии и произведува бензински и дизел мотори, што би имале значајна стратешка улога за Русија.
Иако норвешката компанија не мора да бара дозвола за извоз на своите производи и технологии, Русија тешко ја набавуваше таквата технологија од 2014 година, кога западните земји и воведоа санкции поради кризата во Украина. Норвешка е членка на НАТО и ги поддржа санкциите против Русија.