Израел ќе ја преземе контролата врз целата територија на Појасот Газа, изјави денес израелскиот премиер Бенјамин Нетанјаху, во услови на обновена воена офанзива на палестинската територија.
„Борбите се интензивни и ние напредуваме. Ќе ја преземеме контролата врз целата територија во Појасот Газа. Не попуштаме. Но, за да успееме, мора да дејствуваме на начин на кој тие нема да можат да нè спречат“, рече Нетанјаху во видео објавено на неговиот профил на Телеграм.
Израелскиот премиер додаде дека Израел мора да спречи глад во Газа „од дипломатски причини“, откако најави ограничено враќање на хуманитарната помош на палестинската територија.
Нетанјаху додаде дека „пријателите на Израел“ му рекле дека повеќе не можат да го поддржат продолжувањето на војната ако се прикажат слики од масовен глад на палестинските територии.