Израелскиот премиер Бенјамин Нетанјаху денес изјави дека Израел ги интензивира воените операции во Либан со заземање стратешки позиции и зајакнување на безбедносните тампон зони по зголемувањето на нападите со беспилотни летала на Хезболах.
„Израелската армија дејствува со значителни сили на терен и ја презема контролата врз стратешки доминантните позиции. Ја зајакнуваме безбедносната тампон зона за да ги заштитиме заедниците во северен Израел“, рече Нетанјаху на седница на израелскиот кабинет за безбедност, објави „Тајмс оф Израел“.
Според него, Израел работи на подобрување на решенијата против беспилотни летала што носат експлозиви.
Седницата беше отворена откако Нетанјаху се консултираше со министерот за одбрана Израел Кац и началникот на Генералштабот на израелската армија, генерал-потполковник Ејал Замир во воениот штаб Кирија во Тел Авив порано денес, објави Танјуг.
Израелската армија претходно денес објави дека во последните денови ги проширила своите копнени операции надвор од назначената безбедносна зона во делови од јужен Либан.