Спикерот на американскиот Претставнички дом, Демократката Ненси Пелоси, денеска на брифинг изјави дека Конгресот е соочен со „непријатели одвнатре“ во долниот дом, алудирајќи на некои нејзини колеги.
По немилите настани на 6 јануари, кога насилна толпа поддржувачи на бившиот претседател Доналд Трамп упадна во зградата на Капитол, законодавците сметаат дека таа е се уште недоволно обезбедена и дека се потребни дополнителни мерки.
-Сметам дека ни требаат дополнителни мерки за поголема безбедност на членовите, кога непријателот е меѓу нас во Претставничкиот дом, и членовите се загрижени поради оваа закана покрај тоа што се случува и надвор, изјави Пелоси.
Запрашана што мислела со кажаното „непријателот е меѓу нас“, таа одговори дека „постојат членови на Конгресот кои носат пиштоли во салата и кои се заканувале на други членови на Конгресот“.
Спикерот на Претставничкиот дом очекува скорешна објава на исцрпен извештај за безбедноста на највисокиот законодавен дом на САД, подготвен од пензионираниот заменик-генерал Расел Оноре.