Јавното обвинителство на Милано отвори кривична постапка против непознати лица осомничени дека извршиле политичка и воена шпионажа, отежната со можна терористичка активност, откако беспилотно летало од руско производство го прелета Заедничкиот истражувачки центар.
Како што јави Скај њуз, станува збор за зона на забранети летови, а дронот бил пресретнат од систем за детекција на радиофреквенции. Немаше директни очевидци. Извори од истрагата открија дека снимените фреквенции се поврзани со уред од руско производство, но дека не станува збор за дронови дизајнирани за летови на долг дострел. Тоа значи дека беспилотните летала се контролираат на кратко растојание од местото на летот, максимум неколку десетици километри.
Заедничкиот истражувачки центар на Европската комисија (JRC) е трета по големина локација на Европската комисија по Брисел и Луксембург и еден од водечките европски кампуси со бројни лаборатории и единствена истражувачка инфраструктура.