Високата претставичка на ЕУ за надворешна политика и безбедност, Федерика Могерини и генералниот секретар на НАТО, Јенс Столтенберг, ја осудија поддршката која што Русија им ја дава на проруските сепаратисти во Украина и предупредија дека е загрозен договорот од Минск.
Могерини и Столтенберг во Брисел рекоа дека изборите во Украина се спроведени под контрола на проруските сили и претставуваат отворено прекршување на договорот од Минск за политичко решавање на украинската криза.
-Изборите не само што не се легални и легитимни, туку и се закануваат да го затворат каналот за политички дијалог. Мора да реагираме цврсто, но истовремено да го оставиме отворен каналот за политичко решение-предупреди Могерини.
Столтенберг рече дека ниту една држава членка на НАТО нема да ги признае изборите и ја обвини Русија, дека повторно стационира воени сили на границата со Украина.
-Освен што стационира трупи на границата, Русија активно им помага на проруските сили така што им доставува оружје и ги обучува, а воочивме и присуство на руски специјални единици на територијата на Украина- наведе генералниот секретар на НАТО.
Е. Г.