Лидерот на Христијанско-демократската унија (ЦДУ) и премиер на провинцијата Северна Рајна-Вестфалија, Армин Лашет, изјави денеска дека е потребно воведување на построги мерки во Германија со цел да се спречи зголемувањето на заразата со коронавирусот.
Лашет, за кого многумина сметаат дека е наследник на Ангела Меркел на местото канцелар на Германија, истакна дека земјата мора да ги заостри мерките за надминување на јазот сè додека имунизацијата не ја подобри ситуацијата.
– Ние сме многу блиску до целта. За последните метри ни е потребен дополнителен напор и затоа тоа го барам денес, рече Лашет.
Истовремено, тој апелираше до граѓаните дополнително да ги намалат личните контакти, со што ќе се спречи воведување полициски час во текот на ноќта, како и секој да работи од дома доколку е тоа можно.
Лидерот на ЦДУ додаде дека состанокот на премиерите на германските покраини е планиран за 12 април, но оцени дека треба да се одржи порано.