Директорот на руската служба за надворешно разузнавање, Сергеј Наришкин, изјави дека се ближат деновите кога вооружените сили на Украина ќе ја изгубат својата способност да организираат отпор, по што ќе се воспостави „праведен мир“, пренесува РИА Новости.
„Русија сака да воспостави мир на територијата на Украина и тоа постојано го докажува. Се ближи времето кога вооружените сили на Украина ќе ја изгубат својата способност да организираат отпор, а потоа ќе дојде праведен мир“, нагласи тој.
Според него, некои земји од Европската Унија, како и европската бирократија, категорично се противат на таков исход.
Наришкин, исто така, предупреди дека склучувањето мировен договор за Украина може да предизвика „политичко цунами“ во Европа.
Тој оцени дека доколку се постигне „фер мировен договор“ според условите договорени во Алјаска, жителите на европските земји ќе разберат дека таков исход е фундаментално различен од претходните тврдења на европските престолнини за „стратешкиот пораз на Русија“.
„Тогаш на граѓаните на Европа ќе им стане јасно дека едноставно се измамени и дека биле принудени да направат големи економски жртви“, нагласи шефот на СВР.
Тој истакна дека ова може да предизвика не само бројни прашања од граѓаните упатени до политичките раководства на нивните земји, туку и сериозни политички превирања низ целиот европски континент.
Според Наришкин, спротивставувањето на земјите од Европската Унија на мировниот договор произлегува од фактот дека тие „значително инвестирале во војната“.