Најмалку седум лица се убиени, а 22 се ранети во израелски напад врз погреб во Појасот Газа, соопшти болницата Ал-Авда во бегалскиот камп Нусејрат. Болницата соопшти дека нападот се случил за време на погребот на Палестинец кој беше убиен во друг израелски напад претходно во петокот, објави Гардијан.
Израел и палестинското движење Хамас постигнаа договор за прекин на огнот во октомври за да се стави крај на двегодишната војна, но борбите продолжија.
Според Министерството за здравство на Газа, најмалку 1.123 лица се убиени откако стапи на сила прекинот на огнот.
Министерството води детална евиденција за жртвите, која генерално се смета за веродостојна од агенциите на Обединетите нации и независните експерти. Независна истражна комисија на ОН заклучи дека Израел наводно продолжува да врши геноцид со намерно таргетирање на палестинските деца во Појасот Газа, додава британскиот весник.
