Лондонскиот аеродром Хитроу најави дека поради намалениот број на летови во кризата со коронавирусот ќе затвори една од двете писти, одредувајќи го како приоритет превозот на медицински материјали.
-Целта е да се зајакне отпорноста и безбедноста на вработените, патниците и товарот на пандемијата на Ковид-19, изјави портпаролот на Хитроу.
Портпаролот додаде дека аеродромот ќе остане отворен дури и ако во светот има значително помал број летови.
Хитроу очекува 53 процентен раст на превозот на товар на неделно ниво откако за приоритет го одредија превозот на медицински материјали, пишува во писмото на службеник од Хитроу.
Од Хитроу тврдат дека аеродромот е најпрометен во светот, со повеќе од 80 милиони патници за 2019 година. Вкупниот број на авиони што полетале од Хитроу минатата година е 475.600.