Москва во петокот ги забележа најсилните снежни врнежи во последните 56 години, при што 42 проценти од месечните врнежи паднаа за 24 часа, соопшти рускиот метеоролошки центар Фобос.
Метеорологот Евгениј Тишковец изјави дека снежната бура во централна Русија кулминирала со рекордни снежни врнежи што го парализирале копнениот и воздушниот сообраќај. Тишковец нагласи дека таков „снежен Армагедон“ не се случил во Москва среде зима во последните 56 години.
Според него, мерачот на врнежи на главната московска метеоролошка станица ВДНХ измерил 22 милиметри за 24 часа, или 42 проценти од месечната норма.
„Снежните врнежи се намалија преку ноќ, а до утрото паднаа уште два милиметри лесен снег“, рече Тишковец, објави РИА Новости.
Тој истакна дека со ова е соборен рекордот поставен во 1976 година за 9 јануари, кога градот регистрирал 12,9 милиметри врнежи.
Тој додаде дека вкупниот број е буквално еден милиметар помалку од изедначување на дневниот рекорд за јануари, кој постои од 1970 година.