Експлозија на стратешкиот патен правец за Крим и железничкиот мост што го поврзува полуостровот со Русија урна делови од еднонасочниот пат, што предизвика овации од украинските власти, но без директно преземање на одговорноста.
Русија го окупираше Крим во 2014 година, а мостот долг 19 километри, кој го поврзува полуостровот со руската патна и железничка мрежа, го отвори рускиот претседател Владимир Путин со голема прослава четири години подоцна. Мостот на Крим сега е важен пат за снабдување на руските сили кои ја презедоа контролата над поголемиот дел од провинцијата Херсон во јужна Украина.
Рускиот национален антитерористички комитет објави на социјалните мрежи дека експлозијата се случила во 6.07 часот во товарно возило, при што се запалиле седум вагони со резервоари за гориво, кои биле на пат кон полуостровот.
Сергеј Аксјонов, рускиот гувернер на Крим, на социјалните мрежи изјави дека патниот мост останал неоштетен во еден правец, иако сообраќајот е во прекин за да се процени штетата.
Путин и наредил на владата да формира државна комисија за да го истражи инцидентот, јави агенцијата ТАСС, цитирајќи го портпаролот на Кремљ, Дмитриј Песков. Владимир Константинов, претседателот на кримскиот парламент, изјави дека „украинските вандали успеале да стигнат до мостот на Крим со своите крвави раце“, ја цитира Интерфакс неговата изјава.
„Сега имаат со што да се гордеат. За 23 години од нивната економска активност не успеаја да изградат ништо вредно за внимание на Крим, но (сега) успеаја да го оштетат патот на рускиот мост“, додаде Константинов.
Константинов рече дека штетата не е од „сериозна природа“ и дека наскоро ќе биде санирана.