Шефовите на дипломатијата на земјите-членки на Европска унија се договорија да работат на нов пакет санкции кон Северна Кореја.
– Се договоривме да го поддржиме Советот за безбедност на Обединети нации во донесувањето на нови мерки во областа на економските санкции против Северна Кореја. Во исто време, ќе работиме на тоа трети земји во целост да ја применат одлуката на СБ на ОН, каква и да е, изјави високата претставничка за надворешна политика и безбедност на ЕУ, Федерика Могерини по првиот ден од неформалниот состанок на министрите за одбрана и надворешни работи.
Таа додаде дека ЕУ министрите се согласиле да придонесат за новата одлука на СБ на ОН со воведување на автономни мерки од Унијата.
– Целиот притисок, кога станува збор за санкциите на ОН и на ЕУ е со цел да се отвори дипломатски дијалог, кој во моментот не постои, посочи Могерини.
Таа повтори дека санкциите не се цел сами по себе туку средство за отворање на политички дијалог.
– ЕУ се залага за политички дијалог, кој ќе води до целосно нуклеарно разоружување на Корејскиот Полуосторов, истакна Могерини.