Во пресрет на 3 мај, Светскиот ден на слободата на печатот, највисоките претставници на Советот на Европа го истакнуваат значењето на слободата на изразување и на печатот посебно во актуелниот контекст со пандемијата на Ковид-19, јави дописникот на МИА.
-Слободното и квалитетно новинарство е предност на демократијата. Пандемијата со Ковид -19 нè потсетува на суштинската улога што ја играат новинарите и медиумските професионалци во обезбедувањето доверливи информации, борбата против дезинформациите што можат да предизвикаат паника и барајќи носителите на одлуки да бидат одговорни пред граѓаните, истакнува комесарот на Советот на Европа за човекови права Дуња Мијатовиќ.
Прославите околу Светскиот ден на слободата на печатот на 3 мај ќе имаат поинаква форма оваа година, но тие нема да се променат во суштина.
-Ние мора да ја искористиме оваа прилика да паузираме и да изразиме благодарност до новинарите и медиумските професионалци, кои преку нивната непроценлива работа им служат на општото добро. Ние мора да ги признаеме нивните жртви – и оние на нивните семејства – направени во служба на нашите интереси. Затоа што тоа го прават новинарите во нормални времиња, а уште повеќе во услови на криза како што е денес. Ни носат една од најмоќните алатки што ги имаме на располагање за да донесуваме одлуки што ни се важни: сигурни информации, продолжува Комесарот за човекови права.
-Без разлика дали се одлични истражувачки новинари кои покриваат глобални кризи или несигурни хонорарни соработници за некој локален весник, нивната работа се однесува на сите нас. Тие изложуваат неправди, кршење на законот, корупција и злоупотреба на службената должност. Тие ги ставаат во центарот на вниманието владините активности. Тие копаат под површината за да ја откријат вистината. И, тие го привлекуваат нашето внимание на надежни настани што можат да поттикнат промена во другите делови на светот, вели Мијатовиќ.
Ова е причината зошто слободата на печатот е едно од правата утврдени во националните устави и меѓународните договори, нагласува таа.
– Затоа, треба да се заложиме повеќе за независноста и безбедноста, особено економската и социјалната на новинарите и медиумските професионалци. Безбедноста на новинарите мора да се гарантира во секое време, во интерес на правдата, но и во името на принципот на демократијата.
За комесарот за човекови правана Советот на Европа, во текот на изминатата деценија, светот на новинарството надмина многу пречки, од кои некои го загрозија и самото постоење на повеќе органи за информирање и го влошија медиумскиот плурализам.
-Но, новинарството е сè уште корисно за нашите животи. Тоа беше, ќе биде и ќе продолжи да биде апсолутно суштинско значење, вели таа и додава:
-Како што се приближува 3 мај, сакам да им оддадам почит на сите новинари и професионалци во медиумите кои работат на одбрана на вистината и правдата. Премногу од нив платија со својот живот или ги жртвуваа своите слободи за да ни дозволат да донесеме јасни одлуки и да ги направат нашите општества поправедни.