Германската канцеларка Ангела Меркел се изјасни против воено решение на конфликтот во Украина и за негово решавање со политички средства.
– Не сакаме воена интервенција. Но, ние сме должни да ги употребиме сите дипломатски напори и по потреба да ги поддржиме нашите политички барања и со помош на санкции, изјави Меркел во интервју за денешниот број на списанието „Цицеро“.
Германската канцеларка ситуацијата ја оцени како многу сериозна.
– Ние, Германците треба да се обидеме да направиме се што ќе помогне за обезбедување на дипломатско решение, изјави Меркел, додавајќи дека чувствува одговорност за изнаоѓање на решение.
Меркел, исто така, нагласи дека е многу важно да постои единствен европски став, вклучително и донесувањето одлука за спроведување на санкции, како и да има единствена позиција со САД.