Заменик-претседателот на рускиот Совет за безбедност, Дмитриј Медведев, оцени дека американскиот претседател Доналд Трамп веројатно нема да ја прекине помошта за Украина, вклучително и размената на разузнавачки информации.
Коментирајќи ги резултатите од американските избори за Конгресот и поразот на републиканците, Медведев на социјалната мрежа „Макс“ се осврна на досегашните разговори со администрацијата на Трамп.
„Со актуелната американска администрација се водат прилично корисни разговори за Украина, но ништо повеќе од тоа“, напиша Медведев.
Тој оцени дека украинските власти никогаш не му придавале особено значење на американскиот претседател.
„Киев никогаш не обрнувал премногу внимание на шефот на Белата куќа“, наведе Медведев, додавајќи дека украинските власти „без никакво двоумење биле дрски кон Трамп“.
Според неговата проценка, по изборниот пораз на републиканците, украинското раководство дополнително ќе се дистанцира од американскиот претседател.
„Од сега киевскиот режим целосно ќе се дистанцира и едноставно ќе го игнорира ослабениот американски претседател“, оцени Медведев.
Сепак, тој смета дека Трамп нема да преземе драстични мерки против Украина, иако има можност за тоа.
„Трамп несомнено може да го исклучи „Старшилд“ и да престане да споделува разузнавачки информации. Но, нешто ми кажува дека нема да го направи тоа“, напиша Медведев.
Украина ги користи и цивилната услуга „Старлинк“ и побезбедниот комуникациски систем „Старшилд“, во зависност од потребите. Двата системи функционираат преку мрежи од сателити во ниската Земјина орбита, лансирани од компанијата „СпејсИкс“.
„Старлинк“ им овозможува на воените единици да ја координираат комуникацијата, особено во оддалечените делови од бојното поле. „Старшилд“, пак, на украинските оператори на дронови им овозможува следење цели во реално време, како и управување со дронови-пресретнувачи.
Русија нема одобрение за користење на „Старлинк“, а мрежата не функционира кога Украина испраќа ракети со долг дострел или дронови длабоко на руска територија за напади врз нафтени рафинерии.
Медведев истакна дека Трамп го смета за непредвидлив политичар, но дека актуелните политички околности не одат во прилог на радикални потези.
„Тој е непредвидлив човек, но сега не е време за егзотични потези. Освен тоа, нишалото на отповикувањето ќе продолжи да се ниша без оглед на политичката клима“, предупреди Медведев.