Поранешниот руски претседател и актуелен заменик-претседател на рускиот Совет за безбедност Дмитриј Медведев смета дека постои голема веројатност актуелниот американски претседател Џо Бајден да биде поразен во трката за неговиот втор мандат на претседателските избори во САД следната година, објави руската државна агенцијата Тасс.
Тој тврди дека администрацијата на Бајден се соочува со потенцијален импичмент (што ќе биде тешко) или пораз на изборите (што е многу веројатно да се случи).
„Затоа, тој прибегнува кон остри тактики на уцена, континуирана хистерија и ширење смешни инсинуации за нас“, напиша Медведев на својот канал на Телеграм.
Тој рече дека претседателските администрации во САД претходно го уценувале Конгресот под мантрата: „Дајте му готовина на нашиот човек или ќе треба сами да се бориме со Русите“. Сепак, тој е убеден дека Бајден направил историски преседан, бидејќи никогаш порано во историјата на САД Белата куќа „не извлекла толку многу пари за земја која се движи на работ на колапс“.
„Од Кубанската ракетна криза, заканата од директен конфликт меѓу Русија и НАТО што може да доведе до Трета светска војна не е толку реална“, рече тој.
Тој, исто така, предвиде дека Вашингтон несомнено ќе обезбеди дополнително финансирање за режимот во Киев, ако не оваа година, тогаш следната година, со цел „по секоја цена да го одржи својот бизнис модел управуван од војната“.
Да потсетиме, Русија во февруари минатата година започна инвазија, каде еден од аргументите беше дека НАТО ги подготвува Украинците за офанзива против Русите. По избувнувањето на целосната руска инвазија на Украина, Медведев постојано се закануваше со употреба на нуклеарно оружје и со избивање на Трета светска војна.