Војната меѓу Русија и Украина може да се заврши само со преговори, иако би сакал пораз на Русија во Украина, изјави францускиот претседател Емануел Макрон.
„Сакам пораз на Русија во Украина и би сакал Украина да ја одбрани својата позиција, но убеден сум дека крајот нема да се постигне со воени средства“, рече Макрон во интервју за телевизијата France Inter и весниците Le Figaro и Le Journal du Dimanche.
„Ниту една страна не може целосно да надвладее. Затоа што ефектите од мобилизацијата не се толку големи како што се очекуваше и има ограничени капацитети“, рече тој. Макрон повтори дека на Украина сега и е потребна воена офанзива за да ја врати Русија на преговарачка маса. Но, тој не мисли дека Русија треба да биде нападната на нејзино тло, како што некои сугерираат.
„Пред сè, овие набљудувачи сакаат да ја скршат Русија. Ова никогаш не било и никогаш нема да биде став на Франција“, нагласи Макрон.
Тој изрази сомневање за можноста за значителен внатрешен притисок во Русија што би помогнал да се стави крај на војната.
„Дали искрено мислиме дека од руското граѓанско општество ќе произлезе демократско решение по години радикализација и конфликти? Јас навистина го сакам тоа, но навистина не верувам“, рече францускиот претседател и заклучи дека секоја алтернатива на рускиот претседател Владимир Путин во сегашната постава му изгледа полошо.