Венецуелскиот претседател Николас Мадуро денес ги повика граѓаните кои се приклучија на Боливарската милиција во последните две недели да одговорат на „првото активирање“ за одбрана на земјата.
– Ќе го одржиме првото активирање на сите оние кои се пријавија, целата Национална милиција и резервистите, за учество во голема организациска и мобилизациска акција на силите, за прв пат во воената историја на земјата, рече Мадуро, објави CNN Español.
Мадуро рече дека целта на мобилизацијата е да вклучи 8,2 милиони луѓе, според бројките што ги даде, и додаде дека кампањата за регрутирање сега ќе биде трајна.
„Вие граѓани, сакани сонародници кои ја сакате оваа земја и сте подготвени да ја браните, за вашето семејство, заедница, историја и достоинство, сега имате траен пристап до системот Патрија“, нагласи Мадуро.
Повикот дојде во време на зголемени тензии меѓу Венецуела и САД, откако Вашингтон во вторникот објави дека уништил наводен брод за трговија со дрога кој ја напуштил венецуелската територија и се движел низ карипските води.
Претходно, САД најавија распоредување воени бродови во Карипското Море како дел од операциите против трговијата со дрога, што Каракас го смета за закана.
Како одговор, властите започнаа процес на регистрација на граѓани за Боливарската милиција.
Оваа резервна формација беше создадена во 2005 година, под претседателот Уго Чавез, под името Генерална команда на националните резерви и национална мобилизација, а беше преименувана во Боливарска милиција во 2009 година.